Si çdo fillim muaji, Autoriteti i Aviacionit Civil publikon buletinin mujor.

Në brendësi të Buletinit të 21-të, do të gjeni të dhëna për numrin e anullimeve, vonesave, shifrat e pasagjerëve, statistika, aktivitete të ndryshme të Drejtorive të AAC-së, si dhe informacione të fushës së aviacionit nga vendi dhe bota.

Ndër temat dhe artikujt kryesorë të këtij numri gjejmë si më poshtë:

• AVIACION NË KOHËN E PANDEMISË
• “AIR ALBANIA” NË SHËRBIM TË NEVOJAVE TË QYTETARËVE SHQIPTARË
• ANALIZË – EUROCONTROL MBËRRITJA NË KOHË: PËRPARËSIA E PASAGJERIT
• COVID 19: KOMISIONI JEP UDHËZIME PËR TË DREJTAT E PASAGJERËVE NË BE
• ANALIZA STATISTIKORE PËR PERIUDHËN SHKURT-MARS 2020

Lexim të këndshëm!

Buletini-XXI-Prill-2020

Autoriteti Aviacionit Civil përgënjeshtron lajmet e publikuara nga një media, sipas të cilave fluturimet me Italinë nuk janë pezulluar.

Sipas Urdhrit të Ministres së Infrastrukturës dhe Energjisë të datës 09 Mars 2020, u ndaluan fluturimet për/nga Aeroporti Ndërkombëtar “Nënë Tereza” dhe 12 aeroporteve në provincat veriore të Italisë. Në datë 10 Mars 2020, Urdhëri i ri i Ministres së Infrastrukturës dhe Energjisë ndaloi të gjithë fluturimet për/nga Shqipëria dhe Italisë.

Njoftojmë të gjithë shtetasit shqiptarë se në kuadër të masave për parandalimin e përhapjes së mëtejshme të koronavirusit, Bashkimi Evropian ka vendosur të kufizojë përkohësisht (për një periudhë tridhjetë ditore) hyrjen në territorin e BE+ të shtetasve nga vendet e treta.

Kufizimi i përkohshëm i udhëtimit do të zbatohet për të gjitha udhëtimet jo-thelbësore nga vendet e treta në zonën e BE+. Përjashtimet nga kufizimi i përkohshëm i udhëtimit do të bëhen vetëm në rastet e udhëtimeve për qëllime thelbësore.

Përjashtim nga kufizimi i përkohshëm i udhëtimit do të bëjnë shtetasit e të gjitha vendeve anëtare të BE-së dhe vendeve jo-anëtare që i janë bashkëngjitur Marrëveshjes Schengen, në rastet e kthimit të tyre në shtëpi. Përjashtimi do të zbatohet për:

– të gjithë shtetasit e vendeve anëtare të BE-së, të shtetasve të vendeve nënshkruese të Schengen-it dhe për anëtarët e familjeve të tyre;

– shtetasit e vendeve të treta që janë rezidentë afatgjatë në bazë të Direktivës së BE për rezidencën afatgjatë dhe personat që kanë përfituar të drejtën e qëndrimit nga direktiva të tjera të BE-së, ligjet kombëtare, apo që kanë një vizë qëndrimi afatgjatë.

Kufizimi i përkohshëm i udhëtimit nuk do të zbatohet për udhëtarët e tjerë që kanë një funksion/nevojë thelbësore, përfshirë:

– profesionistët shëndetësorë, kërkuesit mjekësorë dhe profesionistët e e kujdesit ndaj të moshuarve;

– punonjësit e kufirit;

– personeli i angazhuar me transportin e e mallrave dhe çdo personel tjetër transporti, në masën e nevojshme;

– diplomatët, stafi i organizatave ndërkombëtare, personeli ushtarak dhe punonjës të ndihmës humanitare gjatë ushtrimit tëfunksioneve të tyre;

– Pasagjerët në tranzit;

– Pasagjerët që udhëtojnë për arsye të domosdoshme familjare;

– Personat që kanë nevojë për mbrojtje ndërkombëtare, ose për arsye të tjera humanitare.

Për personat që do të lejohen të hyjnë në zonën BE+ do të ketë kontrolle shëndetësore të koordinuara dhe të përforcuara.

Nisur nga serioziteti i situatës, Ministria për Evropën dhe Punët e Jashtme këshillon të gjithë shtetasit e Republikës së Shqipërisë dhe shtetasit e vendeve të treta që qëndrojnë aktualisht në territorin e RSH të mos kryejnë udhëtime të panevojshme jashtë Shqipërisë, për të shmangur kështu përhapjen e virusit.

Ministria për Evropën dhe Punët e Jashtme gjithashtu këshillon të gjithë shtetasit që duan të kryejnë udhëtime thelbësore të konsultojnë faqen online të MEPJ (www.punetejashtme.gov.al), si edhe faqet online të ambasadave të akredituara në RSH, për informacione të përditësuara rreth kushteve të udhëtimeve dhe kufizimeve respektive.

Sqarim: Territori “BE+” do të përfshijë të gjitha vendet anëtare të Schengen-it, përfshirë Bullgarinë, Kroacinë, Qipron dhe Rumaninë, si edhe katër vendet jo-anëtare të BE-së, që i janë bashkëngjitur Marrëveshjes Schengen (Islanda, Norvegjia, Lihtenshteini dhe Zvicra). Irlanda dhe Britania e Madhe do t’i bashkëngjiten territoreve ku do të kufizohet përkohësisht hyrja, nëse vendosin vetë ta bëjnë një gjë të tillë.

Si çdo fillim muaji, Autoriteti i Aviacionit Civil publikon buletinin mujor.

Në brendësi të Buletinit të 20-të, do të gjeni të dhëna për numrin e anullimeve, vonesave, shifrat e pasagjerëve, statistika, aktivitete të ndryshme të Drejtorive të AAC-së, si dhe informacione të fushës së aviacionit nga vendi dhe bota.

Ndër temat dhe artikujt kryesorë të këtij numri gjejmë si më poshtë:

• KORONAVIRUSI – A DUHET TË ANULOJMË OSE TË SHTYJMË PLANET E UDHËTIMIT? LINJAT AJRORE PARALAJMËROJNË PËR PËRKEQËSIMIN E NDIKIMIT TË VIRUSIT
• TIRANË: VIZITË DHE BASHKËPUNIM ME EKSPERTËT E “ICAO RUNWAY SAFETY GOTEAM”
• TIRANË: IMPLEMENTIMI I RREGULLAVE EUROPIANE TË STANDARDIZUARA TË AJRIT
• OPINION NGA GERI BRAHO – NJË QASJE E RE MBI MENAXHIMIN E ZHURMAVE
• GRATË NË AVIACION: JO TË GJITHA FLUTUROJNË ME FSHESË

Lexim të këndshëm!

Buletini-XX-Mars-2020

Në vijim njoftimit të mëparshëm për ndalimin e fluturimeve për dhe nga Aeroporti Ndërkombëtar “Nënë Tereza” dhe 12 aeroporteve në veri të Italisë, për shkak të situatës së krijuar në Itali nga përhapja e COVID-19, masave të marra nga qeveria italiane për vendosjen e karantinës në gjithë provincat e shtetit fqinj, si dhe masave parandaluese të përhapjes së virusit në vendin tonë, duke filluar nga ora 12:00 e ditës së sotme 10 Mars 2020 ndalohen të gjitha fluturimet për dhe nga Aeroporti Ndërkombëtar “Nënë Tereza” dhe të gjithë aeroporteve italiane, deri në një njoftim të dytë.

NJOFTIM

Në vijim të situatës së krijuar në Itali për shkak të përhapjes së COVID-19, masave të marra nga qeveria italiane për vendosjen e karantinës në veri të Italisë, si dhe masave parandaluese të përhapjes së virusit në vendin tonë, në zbatim të urdhrit të Ministrisë së Infrastrukturës dhe Energjisë, ndalohen të gjitha fluturimet për dhe nga Aeroporti Ndërkombëtar “Nënë Tereza” dhe:

• Aeroporti Milano Malpensa (MXP)
• Aeroporti Milano Bergamo (BGY)
• Aeroporti Bologna (BLQ)
• Aeroporti Firenze (FLR)
• Aeroporti Genoa (GOA)
• Aeroporti Perugia (PEG)
• Aeroporti Pisa (PSA)
• Aeroporti Rimini (RMI)
• Aeroporti Venezia (VCE)
• Aeroporti Verona (VRN)
• Aeroporti Torinos (TRN)

Autoriteti Aviacionit Civil ka lëshuar menjëherë udhëzimin drejtuar Aeroportit Ndërkombëtar “Nënë Tereza” dhe ofruesit të shërbimit të lundrimit ajror “Albcontrol” për nxjerrjen e njoftimeve të nevojshme për zbatimin e këtij kufizimi të fluturimeve për/nga aeroportet e lartpërmendura, deri në një njoftim të dytë.

Si çdo fillim muaji, Autoriteti i Aviacionit Civil publikon buletinin mujor.

Në brendësi të Buletinit të 19-të, do të gjeni të dhëna për numrin e anullimeve, vonesave, shifrat e pasagjerëve, statistika, aktivitete të ndryshme të Drejtorive të AAC-së, si dhe informacione të fushës së aviacionit nga vendi dhe bota.

Ndër temat dhe artikujt kryesorë të këtij numri gjejmë si më poshtë:

• “FLYNAS”: SË SHPEJTI ME LINJË DIREKTE RIAD-TIRANË ME ÇMIMET MË KONKURRUESE NË TREG
• ANALIZË NGA KRISLEN KERI ANALIZË E TË DHËNAVE TË TRAFIKUT NË AEROPORTIN NDËRKOMBËTAR “TIA” PËR VITIN 2019
• CORONAVIRUS: SA TË SHQETËSUAR DUHET TË JEMI?
• TIRANË: ZHVILLOHET KURSI “ICAO AIR CARGO AND MAIL SECURITY” NË AAC
• HAPËSIRA AJRORE SHQIPTARE: KOORDINIMI CIVIL-USHTARAK
• MBI PEZULLIMIN E LICENCËS SË KOMPANISË AJRORE “ERNEST” S.P.A.

Njoftim i rëndësishëm për situatën e kompanisë italiane “Ernest”

Me anë të një tjetër deklarate zyrtare, pas asaj të 29 Dhjetorit 2019, Autoriteti i Aviacioni Civil italian (ENAC), njofton se pezullimi për licencën e kompanisë ajrore “Ernest”, duke filluar nga ora 00:01 të datës 13 Janar 2020, mbetet në fuqi.

Sipas ENAC, kompania e fluturimeve “Ernest”, nuk do të jetë në gjendje të kryejë asnjë fluturim dhe transportuesi do të pushojë të gjitha operacionet.

Deklarata për shtyp nga ENAC n. 2/2020

Reagim i AAC për rastin “Ernest”

Pas njoftimit nga Autoriteti Italian i Aviacionit Civil (ENAC) për pezullimin e licencës së kompanisë “Ernest”, si autoriteti përgjegjës për licencimin e kësaj kompanie, Autoriteti Aviacionit Civil Shqiptar (AAC), i dërgoi një kërkesë sqaruese ENAC dhe u informuam se për shkak të vështirësive financiare me likuiditetin e kompanisë, autoriteti italian ishte detyruar të merrte këtë vendim me shpresën se kompania, deri më datë 13 Janar 2020, do jetë në gjendje të vërtetojë garanci financiare të nevojshme për vijimin e aktivitetit.

Kompania “Ernest” nga ana e saj iu përgjigj AAC-së, se do të angazhohej në marrjen e masave të nevojshme për garantimin e zhvillimit të fluturimeve të programuara deri më datë 13 janar.

Për sa më sipër, që nga momenti i njoftimit për pezullim, kompania është duke operuar me kapacitet të kufizuar në avionë dhe staf operues. Kjo situatë ka sjellë edhe anulime dhe ri-skedulime të fluturimeve, por jo deri në pikën e ndalimit total të fluturimeve.

– Duke qenë se kompania ende ka një licencë aktive nga autoriteti italian deri më dt. 13/01, pasagjerët duhet të marrin masat që deri në këtë datë të lidhen në telefon me shërbimin e klientit të kompanisë dhe/ose agjencinë ku kanë prerë biletën dhe të përpiqen të sigurojnë një vend në fluturimet që kompania po kryen.

– Nëse pasagjerët nuk e kryejnë dot fluturimin me Ernest dhe zgjedhin të presin një biletë me një kompani tjetër, atyre u rekomandohet të bëjnë kërkesën për rimbursim dhe kompensim nëpërmjet sistemit të kompanisë në faqen e tyre në internet duke klikuar në adresën/linkun e mëposhtëm:

Refund Request Form

– Kërkesën për rimbursim duhet t’a bëjnë edhe pasagjerët që kanë prerë bileta përtej datës 13 Janar 2020.

– Është shumë e rëndësishme që pasagjerët të bëjnë kërkesat për rimbursim dhe kompensim si i vetmi mekanizëm mbrojtës në dispozicionin e tyre sipas ligjit të BE-së.

– Në rast se kompania do dështoj t’i tregoj autoritetit Italian, aftësinë për të mbajtur të vlefshme licencën e operimit, bazuar në legjislacionin e shtetit fqinj, asaj do i duhet të zbatojë hapat e mëtejshëm sipas legjislacionit italian.

– Në lidhje me rimbursimet dhe/ose kompensimet në rast se kjo ndodh, pasagjerët këshillohen të zbatojnë udhëzimet që do të dalin në vijim nga autoriteti italian dhe/ose entitete të tjera shtetërore në vendin fqinj.

AAC është duke ndjekur situatën e kompanisë italiane “Ernest” dhe do ti kërkojë në vazhdimësi kompanisë dhe autoriteteve italiane, garantimin e respektimit të të drejtave të pasagjerëve të prekur, si autoriteti përgjegjës për licencimin e kësaj kompanie.

AAC në përputhje me legjislacionin evropian dhe shqiptar, që rregullon të drejtat e pasagjerit, në një situatë sikurse po kalon kompania italiane, do publikojë rast pas rasti informacione të përditësuara me qëllim që të ndihmojmë pasagjerët në vendimmarrjet e tyre.

“Rrjeti i të Rinjve të Aviacionit”

Eurocontrol, organizatë në mbështetje të aviacionit evropian, në bashkëpunim me Autoritetin e Aviacionit Civil Shqiptar, organizon programin “Rrjeti i të Rinjve të Aviacionit” – (Young Aviation Network), i cili do të zhvillohet në qytetin e Brukselit, Belgjikë, në datat 1-15 Korrik, 2020. Nga Shqipëria do të përzgjidhet për të marrë pjesë vetëm një student, i cili duhet të plotësojë kriteret e mëposhtme:

• të jetë student i moshës 18-22 vjeç
• të jetë i apasionuar pas fushës së aviacionit
• të aspirojë të punësohet në këtë fushë
• të ketë njohuri shumë të mira të gjuhës angleze.

Programi do të zhvillohet në formën e një kampi veror dhe do të trajtojë çështje të lidhura me koncepte operacionale, teknike të aviacionit, ashtu edhe me ato institucionale dhe ndërkombëtare në këtë fushë.

Gjithashtu, do të zhvillohen vizita studimore në institucione të lidhura me fushën e aviacionit, ku do t’u jepet mundësia të marrin pjesë në ushtrime stimuluese, për t’u familjarizuar me operimet aktuale në aviacion.

Në përfundim të këtij programi, studenti do të përgatisë një raport të shkurtër, i cili do të përmbajë ekperiencën e përfituar si dhe observacionet dhe idetë. Po ashtu, do të pajiset edhe me certifikatë pjesëmarrjeje. Raporti më cilësor do të marrë një çmim në shenjë mirënjohje për performancën më të mirë.

Studentët e interesuar duhet të aplikojnë online në adresën info@acaa.gov.al me subjektin: Aplikim për programin YAN, brenda datës 26.01.2020, duke bashkëlidhur CV të rifreskuar dhe letrën e motivimit.

Në letrën e motivimit ata duhet të shpjegojnë:

• arsyen e aplikimit
• lidhjen e fushës së arsimit të tyre me aviacionin
• theksimin e treguesve/fakteve të dëshirës dhe pasionit të tyre për fushën e aviacionit
• ambicies dhe planit për t’u punësuar në këtë fushë.

Gjithashtu, nëse zotërojnë certifikata të trajnimeve apo kualifikimeve, referenca si dhe angazhime vullnetare apo përvoja pune, janë të lutur t’i bashkëlidhin së bashku me dokumentat e tjerë.

Për çdo pyetje në lidhje me këtë njoftim, studentët mund t’i drejtohen në çdo kohë Autoritetit të Aviacionit Civil, në adresën e e-mailit: info@acaa.gov.al 
Aplikimet që nuk plotësojnë të gjitha kërkesat e mësipërme dhe/ose dorëzohen pas afatit të caktuar do të skualifikohen.

Gjithashtu, aplikantët duhet të sigurohen të kenë pashaportë me afate të vlefshme përgjatë periudhës së pjesëmarrjes në program. Shpenzimet financiare për udhëtimin, akomodimin dhe ushqimin do të mbulohen nga programi.

Ju urojmë suksese!